ឯកអគ្គរាជទូតជប៉ុន បញ្ជាក់ជំហរក្នុងការលើកកម្ពស់សន្តិភាព និងការផ្សះផ្សាជាតិជាមួយកម្ពុជា បន្ទាប់ពីបានទស្សនាសារមន្ទីរទួលស្លែង

ភ្នំពេញ, ថ្ងៃទី២៧ ខែតុលា ឆ្នាំ២០២៦៖ ឯកឧត្តម អ៊ីស៊ីហ៊្សុគិ ហ៊ីដេអុ (Ishizuka Hideo) ឯកអគ្គរាជទូតវិសាមញ្ញ និងមានសមត្ថភាពពេញលេញនៃប្រទេសជប៉ុន ប្រចាំព្រះរាជាណាចក្រកម្ពុជា បានអញ្ជើញធ្វើដំណើរទស្សនកិច្ចផ្លូវការទៅកាន់ សារមន្ទីរឧក្រិដ្ឋកម្មប្រល័យពូជសាសន៍ទួលស្លែង មន្ទីរ ស-២១ កាលពីថ្ងៃទី២៦ ខែតុលា ឆ្នាំ២០២៦។

នៅក្នុងឱកាសទស្សនកិច្ចនោះ ឯកឧត្តម ឯកអគ្គរាជទូត និងគណៈប្រតិភូ ត្រូវបានទទួលស្វាគមន៍ និងសម្របសម្រួលធ្វើបទបង្ហាញយ៉ាងលម្អិតពី លោក ហង្ស និស្ស័យ ប្រធានការិយាល័យសារមន្ទីរ និង លោកស្រី ហេង សុផារ៉ា ប្រធានផ្នែកអប់រំ នៃសារមន្ទីរឧក្រិដ្ឋកម្មប្រល័យពូជសាសន៍ទួលស្លែង។

នាឱកាសនោះ ឯកឧត្តម អ៊ីស៊ីហ៊្សុគិ ហ៊ីដេអុ បានសម្តែងនូវក្តីរំជួលចិត្ត និងបានអញ្ជើញឧទ្ទិសបួងសួងយ៉ាងស្ងៀមស្ងាត់ជូនដល់វិញ្ញាណក្ខន្ធប្រជាជនកម្ពុជា ដែលបានបាត់បង់ជីវិតយ៉ាងអយុត្តិធម៌ នៅក្នុងសម័យកាលនៃរបបប្រល័យពូជសាសន៍ខ្មែរក្រហម។


ទន្ទឹមនឹងនេះ ឯកឧត្តមបានសម្តែងនូវការគោរពជាអតិបរមាចំពោះស្មារតីដ៏រឹងមាំ និងដំណើរឆ្លងកាត់របស់ប្រជាជនកម្ពុជា ក្នុងការជំនះលើរាល់ឧបសគ្គ និងគ្រាលំបាកនានា រហូតសម្រេចបាននូវសន្តិភាព ការសម្របសម្រួលសង្គម និងការអភិវឌ្ឍប្រទេសជាតិឱ្យមានការរីកចម្រើនដូចបច្ចុប្បន្ន។

បន្ថែមពីលើការទស្សនាក្នុងសារមន្ទីរ ឯកឧត្តម ឯកអគ្គរាជទូត ក៏បានជួបសំណេះសំណាលដោយផ្ទាល់ជាមួយក្រុម និស្សិតកម្ពុជា ដែលត្រូវបានជ្រើសរើសឱ្យចូលរួមក្នុងគម្រោងក្តីសង្ឃឹម (Okinawa Omoi) ដើម្បីសន្តិភាព ដែលជាកម្មវិធីផ្លាស់ប្តូរ និងបន្តវេនរៀបចំឡើងដោយរដ្ឋបាលខេត្តអូគីណាវ៉ា (Okinawa Prefecture) ប្រទេសជប៉ុន នាខែវិច្ឆិកា ឆ្នាំ២០២៦ ខាងមុខនេះ ដើម្បីឱ្យយុវជនជំនាន់ក្រោយបានសិក្សា ផ្សព្វផ្សាយ និងបន្តស្មារតីសន្តិភាពនិយម។

ឯកឧត្តម បានបញ្ជាក់អះអាងសារជាថ្មីថា ប្រទេសជប៉ុននឹងបន្តឈរប្រកៀកស្មាជាមួយកម្ពុជា ក្នុងការរំឭក និងរក្សាទុកនូវប្រវត្តិសាស្ត្រនៃរបបខ្មែរក្រហម ការលើកកម្ពស់ការផ្សះផ្សាជាតិ ព្រមទាំងការបន្តគាំទ្រដល់ដំណើរការនៃអង្គជំនុំជម្រះវិសាមញ្ញក្នុងតុលាការកម្ពុជា (សាលាក្តីខ្មែរក្រហម - ECCC) ដើម្បីធានាឱ្យបាននូវយុត្តិធម៌ និងកសាងសន្តិភាពយូរអង្វែង៕


រាយការណ៍ដោយ សារព័ត៌មាន The Khmer Daily Network