ស្ថានទូតចិនប្រចាំកម្ពុជា ច្រានចោលព័ត៌មានថា មន្ត្រីរបស់ខ្លួនបានអមដំណើរម្ចាស់សណ្ឋាគារ ហេង ហ្វាង ចុះទៅតំបន់ព្រំដែនថ្មដា

ភ្នំពេញ, ថ្ងៃទី២១ ខែសីហា ឆ្នាំ២០២៦៖ ស្ថានទូតសាធារណរដ្ឋប្រជាមានិតចិន ប្រចាំព្រះរាជាណាចក្រកម្ពុជា នៅថ្ងៃទី២០ ខែសីហា ឆ្នាំ២០២៦ បានចេញសេចក្តីថ្លែងការណ៍ផ្លូវការមួយ ដើម្បីបដិសេធ និងច្រានចោលទាំងស្រុងនូវរាល់ព័ត៌មានដែលបានចុះផ្សាយថា មន្ត្រីរបស់ស្ថានទូតបានចុះទៅកាន់តំបន់ព្រំដែនថ្មដា កាលពីពេលថ្មីៗនេះ។

ការចេញមុខមកបកស្រាយនេះ បានធ្វើឡើងបន្ទាប់ពីមានសារព័ត៌មានមួយចំនួន បានរាយការណ៍ថា មានមន្ត្រីមកពីស្ថានទូតចិនប្រចាំកម្ពុជា បានអមដំណើរម្ចាស់សណ្ឋាគារ ហេង ហ្វាង (Heng Fang Hotel) ដែលជាជនជាតិចិន ចុះទៅកាន់តំបន់ច្រកព្រំដែនថ្មដា ខេត្តពោធិ៍សាត់ ជាប់ព្រំដែនថៃ។

យោងតាមសេចក្តីថ្លែងការណ៍ខ្លីដែលចុះផ្សាយលើបណ្តាញសង្គមផ្លូវការរបស់ស្ថានទូតចិន បានបញ្ជាក់យ៉ាងច្បាស់ថា៖ «ស្ថានទូតចិនប្រចាំកម្ពុជា សូមប្រកាសថា របាយការណ៍ខាងលើ គឺមិនមែនជាការពិតនោះទេ ហើយស្ថានទូតមិនបានបញ្ជូនបុគ្គលិកណាម្នាក់ ទៅកាន់តំបន់ព្រំដែនកម្ពុជា-ថៃ ខាងលើនាពេលថ្មីៗនេះឡើយ»។

ប្រភព និងរូបភាព៖ ទំព័រហ្វេសប៊ុក Wang Wenbin Chinese Ambassador to the Kingdom of Cambodia 汪文斌
បន្ថែមពីលើការបដិសេធនេះ ស្ថានទូតចិនក៏បានអំពាវនាវដល់ស្ថាប័នសារព័ត៌មានពាក់ព័ន្ធ ក៏ដូចជាសាធារណជនគ្រប់មជ្ឈដ្ឋាន សូមមេត្តាផ្ទៀងផ្ទាត់ប្រភពព័ត៌មានឱ្យបានច្បាស់លាស់ និងហ្មត់ចត់បំផុត ជៀសវាងការជឿ ឬចែកចាយបន្តនូវព័ត៌មានដែលមិនមានប្រភពច្បាស់លាស់ និងមិនទាន់បានផ្ទៀងផ្ទាត់ ដែលអាចបង្កឱ្យមានការយល់ច្រឡំជាសាធារណៈ។

គួរបញ្ជាក់ថា តំបន់ថ្មដា ស្ថិតក្នុងស្រុកវាលវែង ខេត្តពោធិ៍សាត់ គឺជាតំបន់សេដ្ឋកិច្ច និងទេសចរណ៍ព្រំដែនដ៏សំខាន់មួយ ដែលតែងតែទទួលបានការចាប់អារម្មណ៍ពីអ្នកវិនិយោគ។ ការចេញមកបដិសេធរបស់ស្ថានទូតចិននៅពេលនេះ គឺជាការឆ្លើយតបយ៉ាងរហ័ស ដើម្បីរក្សានូវភាពត្រឹមត្រូវនៃព័ត៌មានពាក់ព័ន្ធនឹងសកម្មភាពផ្លូវការរបស់មន្ត្រីការទូតចិននៅក្នុងប្រទេសកម្ពុជា៕

រាយការណ៍ដោយ សារព័ត៌មាន The Khmer Daily Network