អភិបាលរងឃុំ និងស្វាមី ត្រូវគេរកឃើញថា បាញ់សម្លាប់ខ្លួននៅក្នុងផ្ទះ នាខេត្តពេជ្របូរណ៍ ប្រទេសថៃ

ភ្នំពេញ, ថ្ងៃទី២១ ខែសីហា ឆ្នាំ២០២៦៖ យោងតាមការចុះផ្សាយរបស់សារព័ត៌មានថៃ Khaosod English បានឱ្យដឹងថា អាជ្ញាធរថៃកំពុងបើកការស៊ើបអង្កេតយ៉ាងក្តៅគគុក បន្ទាប់ពីបានរកឃើញសាកសពស្ត្រីជាអភិបាលរងឃុំម្នាក់ និងស្វាមី ដេកស្លាប់ក្នុងថ្លុកឈាមដោយសារគ្រាប់កាំភ្លើង នៅក្នុងផ្ទះរបស់ពួកគេ ក្នុងខេត្តពេជ្របូរណ៍ (Phetchabun) កាលពីព្រលឹមថ្ងៃព្រហស្បតិ៍ ទី២១ ខែសីហា ឆ្នាំ២០២៦។

យោងតាមរបាយការណ៍ពីប៉ុស្តិ៍នគរបាល Ban Klang បានឱ្យដឹងថា នៅវេលាម៉ោងប្រហែល ២ រំលងអធ្រាត្រ នគរបាលទទួលបានសេចក្តីរាយការណ៍អំពីការបាញ់ប្រហារនៅផ្ទះឈើពីរជាន់មួយកន្លែង ស្ថិតក្នុងឃុំបាកឆុង (Pak Chong) ស្រុកឡំសាក់ (Lom Sak)។

នៅជាន់ផ្ទាល់ដីនៃផ្ទះកើតហេតុ សមត្ថកិច្ចបានរកឃើញសាកសពស្ត្រីម្នាក់ឈ្មោះ ស៊ុតចៃ (Sudjai) អាយុ ៤៤ ឆ្នាំ ដេកស្លាប់នៅលើកៅអីបត់។ នៅក្បែរនោះ គេបានឃើញសាកសពបុរសជាស្វាមីឈ្មោះ យ៉ុងយុទ្ធ (Yongyut) អាយុ ៤៧ ឆ្នាំ ដេកស្លាប់នៅលើឥដ្ឋក្នុងបន្ទប់ដេក ជាមួយនឹងអាវុធកាំភ្លើងខ្លីប្រភេទពាក់កណ្តាលស្វ័យប្រវត្តិ (semi-automatic) មួយដើមនៅក្បែរនោះ។

លោកអនុសេនីយ៍ទោ Rathana Phithak Deesaeng មន្ត្រីស៊ើបអង្កេតបានបញ្ជាក់ថា ផ្អែកលើភស្តុតាងនៅកន្លែងកើតហេតុ ប៉ូលីសសង្ស័យថា លោក យ៉ុងយុទ្ធ ជាស្វាមី អាចនឹងបាញ់សម្លាប់ភរិយាមុន រួចទើបបាញ់សម្លាប់ខ្លួនឯងតាមក្រោយ។ ទោះជាយ៉ាងណា ក្រុមអ្នកជំនាញកោសល្យវិច័យកំពុងប្រមូលភស្តុតាងរាងកាយ និងវិទ្យាសាស្ត្របន្ថែម ដើម្បីកំណត់ឱ្យច្បាស់ពីមូលហេតុពិតប្រាកដ។

ប្រភព និងរូបភាព៖ ទំព័រហ្វេសប៊ុក Khaosod English
អ្នកស្រី ស៊ុតចៃ ដែលជាសព គឺជាឥស្សរជននយោបាយក្នុងតំបន់ដ៏សំខាន់ម្នាក់ ដោយអ្នកស្រីកាន់តំណែងជា អភិបាលរងនៃអង្គការរដ្ឋបាលផ្នែកឃុំ (SAO) នៃឃុំបាកឆុង។ អំឡុងពេលកើតហេតុ អ្នកស្រីក៏កំពុងកាន់តំណែងជា «ស្តីទីអភិបាលឃុំ» ជំនួសលោកស្រី Siriyaphorn Mee Saeng ដែលត្រូវបានគណៈកម្មាធិការរៀបចំការបោះឆ្នោត (EC) បញ្ឈរជើងពីការងារ។

ទោះបីជាអ្នកស្រី ស៊ុតចៃ មានតួនាទីនយោបាយក៏ដោយ ប៉ុន្តែនគរបាលបានបញ្ជាក់ថា រហូតមកទល់ពេលនេះ មិនទាន់មានសញ្ញាណណាមួយដែលបង្ហាញថា អំពើឃាតកម្មនេះពាក់ព័ន្ធនឹងបញ្ហានយោបាយក្នុងតំបន់នោះទេ។ មូលហេតុចម្បងត្រូវបានគេដាក់ការសង្ស័យទៅលើ «បញ្ហាផ្ទាល់ខ្លួន» ឬជម្លោះក្នុងគ្រួសារ។ បច្ចុប្បន្ន សមត្ថកិច្ចកំពុងបន្តសាកសួរហត្ថលេខី និងសាក្សីជុំវិញ ដើម្បីបញ្ចប់សំណុំរឿងនេះ៕

រាយការណ៍ដោយ សារព័ត៌មាន The Khmer Daily Network