ស្នាដៃកូនខ្មែរល្បីរន្ទឺពិភពលោក! Collection “Spirit of the Forgotten” របស់ប្រ៊េនកូនខ្មែរ ALmée Couture នឹងបង្ហាញវត្តមាន ក្នុងមហោស្រពភាពយន្តទីក្រុងកាន ឆ្នាំ២០២៦

ជាមោទនភាពដ៏ធំធេងសម្រាប់ព្រះរាជាណាចក្រកម្ពុជា ដែលប្រ៊េនសម្លៀកបំពាក់របស់កូនខ្មែរ ALmée Couture របស់អ្នកច្នៃម៉ូដវ័យក្មេង តាំង សុខហុង នឹងបង្ហាញវត្តមានក្នុងព្រឹត្តិការណ៍មហោស្រពភាពយន្តទីក្រុងកាន លើកទី៧៩ ឆ្នាំ២០២៦ (2026 Cannes Film Festival) ប្រទេសបារាំង។


តាមរយៈប៉ុស្ទ័រ (Poster) បង្ហោះលើគណនីផ្លូវការរបស់ ALmée Couture កាលពីចុងខែមករា ឆ្នាំ២០២៦ បានឱ្យដឹងថា មានកិត្តិយសយ៉ាងក្រៃលែងក្នុងការនាំយក Collection “Spirit of the Forgotten” – Spring / Summer ’26 ទៅចូលរួមដាក់តាំងបង្ហាញក្នុងព្រឹត្តិការណ៍មហោស្រពភាពយន្តទីក្រុងកាន លើកទី៧៩ ឆ្នាំ២០២៦។


ឈុតដ៏ប្រណីតរចនាឡើងយ៉ាងល្អឥតខ្ចោះរបស់ ALmée Couture នឹងត្រូវបានដាក់បង្ហាញនៅក្នុងបន្ទប់តាំងបង្ហាញឯកជន (Private Showroom) នៅ Hotel Juliana Cannes 14 Avenue de Madrid 06400 ទីក្រុងកាន ប្រទេសបារាំង ដែលជាចំណុចប្រសព្វនៃសិល្បៈច្នៃម៉ូដកម្រិតខ្ពស់ បេតិកភណ្ឌ និងសិល្បៈសហសម័យ។


យ៉ាងណាមិញ គេពុំទាន់ដឹងថា Collection “Spirit of the Forgotten” – Spring / Summer ’26 របស់ ALmée Couture នឹងត្រូវបង្ហាញក្នុងថ្ងៃណានៃព្រឹត្តិការណ៍មហោស្រពភាពយន្តទីក្រុងកាន លើកទី៧៩ ឆ្នាំ២០២៦ នៅឡើយទេ មានតែរង់ចាំតាមដានការធ្វើបច្ចុប្បន្នភាពលើទំព័រហ្វេសប៊ុក ALmée Couture៕