បងធំត្រាំ Trump ទំនងចង់បញ្ចប់សង្រ្គាមឱ្យឆាប់រហ័ស ខណៈអ៊ីរ៉ង់កំពុងពិនិត្យមើលសំណើសន្តិភាពរបស់អាមេរិក

(Reuters) — ប្រធានាធិបតីអាមេរិក លោក ដូណាល់ ត្រាំ បានព្យាករណ៍ពីការបញ្ចប់សង្រ្គាមជាមួយអ៊ីរ៉ង់យ៉ាងឆាប់រហ័ស ខណៈដែលទីក្រុងតេអេរ៉ង់កំពុងពិចារណាសំណើសន្តិភាពរបស់សហរដ្ឋអាមេរិក។ ប្រភពបាននិយាយថា សំណើនេះនឹងបញ្ចប់ជម្លោះជាផ្លូវការ ប៉ុន្តែមិនទាន់បានដោះស្រាយលក្ខខណ្ឌសំខាន់ៗរបស់អាមេរិក ដែលទាមទារឱ្យអ៊ីរ៉ង់ផ្អាកកម្មវិធីនុយក្លេអ៊ែរ និងបើកច្រកសមុទ្រ Hormuz ឡើងវិញនៅឡើយទេ។

អ្នកនាំពាក្យក្រសួងការបរទេសអ៊ីរ៉ង់ ដែលដកស្រង់ដោយទីភ្នាក់ងារសារព័ត៌មាន ISNA បាននិយាយថា “ទីក្រុងតេអេរ៉ង់នឹងផ្ដល់ការឆ្លើយតបរបស់ខ្លួន។ ទន្ទឹមនឹងនេះ សមាជិកសភាអ៊ីរ៉ង់ លោក Ebrahim Rezaei ដែលជាអ្នកនាំពាក្យគណៈកម្មាធិការគោលនយោបាយការបរទេស និងសន្តិសុខជាតិ បានពិពណ៌នាសំណើនេះថា "គ្រាន់តែជាបញ្ជីប្រាថ្នារបស់អាមេរិក ជាជាងការពិតជាក់ស្តែង"។

កាលពីថ្ងៃពុធ លោក Trump បានប្រាប់អ្នកយកព័ត៌មាននៅក្នុងការិយាល័យ Oval Office ថា៖ "ពួកគេចង់ធ្វើកិច្ចព្រមព្រៀង។ យើងមានការពិភាក្សាយ៉ាងល្អក្នុងរយៈពេល ២៤ ម៉ោងចុងក្រោយនេះ ហើយវាអាចទៅរួចណាស់ដែលយើងនឹងសម្រេចបានកិច្ចព្រមព្រៀងមួយ"។ លោកបានបន្ថែមថា "វានឹងបញ្ចប់ទៅយ៉ាងឆាប់រហ័ស"។

លោក Trump បានលើកឡើងដដែលៗអំពីលទ្ធភាពនៃកិច្ចព្រមព្រៀងដើម្បីបញ្ចប់សង្រ្គាមដែលបានចាប់ផ្តើមតាំងពីថ្ងៃទី២៨ ខែកុម្ភៈ ប៉ុន្តែរហូតមកដល់ពេលនេះមិនទាន់ទទួលបានជោគជ័យនៅឡើយទេ។ ភាគីទាំងពីរនៅតែមានទស្សនៈខុសគ្នាលើបញ្ហាតឹងតែងជាច្រើន ទាក់ទងនឹង មហិច្ឆតានុយក្លេអ៊ែររបស់អ៊ីរ៉ង់ និងការគ្រប់គ្រងច្រកសមុទ្រ Hormuz ដែលជាកន្លែងដឹកជញ្ជូនប្រេង និងហ្គាស ១ ភាគ ៥ នៃ ពិភពលោកមុនពេលផ្ទុះសង្រ្គាម។

ប្រភពពីប៉ាគីស្ថាន និងប្រភពមួយទៀតដែលដឹងពីកិច្ចការសម្រុះសម្រួល បាននិយាយថា កិច្ចព្រមព្រៀងជិតសម្រេចបានលើអនុស្សរណៈមួយទំព័រ ដែលនឹងបញ្ចប់ជម្លោះជាផ្លូវការ។ ប្រភពបានបន្តថា វានឹងក្លាយជាការចាប់ផ្តើមនៃកិច្ចពិភាក្សាដើម្បីបើកដំណើរការដឹកជញ្ជូនតាមច្រកសមុទ្រឡើងវិញ ការលើកលែងទណ្ឌកម្មរបស់អាមេរិកលើអ៊ីរ៉ង់ និងការកំណត់ការត្រួតពិនិត្យលើកម្មវិធីនុយក្លេអ៊ែររបស់អ៊ីរ៉ង់។

ទោះជាយ៉ាងណាក៏ដោយ ប្រធានសភាអ៊ីរ៉ង់ លោក Mohammad Baqer Qalibaf ហាក់ដូចជាបានចំអកចំពោះរបាយការណ៍ដែលថាភាគីទាំងពីរជិតត្រូវរូវគ្នា ដោយលោកបានសរសេរលើបណ្តាញសង្គមជាភាសាអង់គ្លេសថា "Operation Trust Me Bro failed" (ប្រតិបត្តិការ 'ជឿខ្ញុំទៅបងប្រុស' បានបរាជ័យហើយ)។ លោក Qalibaf បាននិយាយថា របាយការណ៍បែបនេះគ្រាន់តែជាការបំផ្លើសរបស់អាមេរិក បន្ទាប់ពីការបរាជ័យក្នុងការបើកច្រកសមុទ្រ Hormuz។

ក្តីសង្ឃឹមលើកិច្ចព្រមព្រៀងធ្វើឱ្យតម្លៃប្រេងធ្លាក់ចុះ និងភាគហ៊ុនកើនឡើង

របាយការណ៍អំពីលទ្ធភាពនៃកិច្ចព្រមព្រៀងបានធ្វើឱ្យតម្លៃប្រេងសកលធ្លាក់ចុះដល់កម្រិតទាបបំផុតក្នុងរយៈពេលពីរសប្តាហ៍កាលពីថ្ងៃពុធ ដោយតម្លៃប្រេងឆៅ Brent បានធ្លាក់ចុះប្រហែល ១១% មកនៅត្រឹមប្រហែល ៩៨ ដុល្លារក្នុងមួយបារ៉ែល មុនពេលងើបឡើងវិញលើសពី ១០០ ដុល្លារ។ តម្លៃភាគហ៊ុនសកលក៏បានហក់ឡើងខ្ពស់ ហើយទិន្នផលសញ្ញាបណ្ណបានធ្លាក់ចុះ ដោយសារសុទិដ្ឋិនិយមអំពីការបញ្ចប់សង្រ្គាមដែលបានរំខានដល់ការផ្គត់ផ្គង់ថាមពល។

លោក Takamasa Ikeda អ្នកគ្រប់គ្រងផលប័ត្រជាន់ខ្ពស់នៅ GCI Asset Management បាននិយាយថា៖ «ខ្លឹមសារនៃសំណើសន្តិភាពរវាងអាមេរិក និងអ៊ីរ៉ង់នៅមានកម្រិតតិចតួចនៅឡើយ ប៉ុន្តែទីផ្សារមានការរំពឹងទុកថាសកម្មភាពយោធាបន្ថែមនឹងមិនកើតឡើងទេ»។

កាលពីថ្ងៃអង្គារ លោក Trump បានផ្អាកបេសកកម្មកងទ័ពជើងទឹកដែលទើបតែដំណើរការបានពីរថ្ងៃ ដើម្បីបើកច្រកសមុទ្រដែលត្រូវបានបិទខ្ទប់ ដោយលើកឡើងពីវឌ្ឍនភាពក្នុងកិច្ចចរចាសន្តិភាព។ ទូរទស្សន៍ NBC News ដោយផ្អែកលើមន្ត្រីអាមេរិកមិនបញ្ចេញឈ្មោះពីររូប បានរាយការណ៍ថា ការផ្លាស់ប្តូរជំហរភ្លាមៗរបស់លោក Trump បានកើតឡើងបន្ទាប់ពីអារ៉ាប៊ីសាអូឌីតបានផ្អាកការអនុញ្ញាតឱ្យយោធាអាមេរិកប្រើប្រាស់មូលដ្ឋានទ័ពរបស់ខ្លួនសម្រាប់ប្រតិបត្តិការនេះ។ មន្ត្រីអារ៉ាប៊ីសាអូឌីតមានការភ្ញាក់ផ្អើល និងខឹងសម្បារចំពោះការប្រកាសរបស់លោក Trump ថាអាមេរិកនឹងជួយការពារនាវាឆ្លងកាត់ច្រកសមុទ្រ Hormuz ដែលនាំឱ្យពួកគេប្រាប់វ៉ាស៊ីនតោនថា ពួកគេនឹងបដិសេធមិនឱ្យយន្តហោះយោធាអាមេរិកហោះហើរចេញពីមូលដ្ឋានទ័ព ឬឆ្លងកាត់ដែនអាកាសអារ៉ាប៊ីសាអូឌីតឡើយ។

មិនមានការលើកឡើងពីលក្ខខណ្ឌសំខាន់ៗរបស់អាមេរិក

ប្រភពដែលដឹងពីការសម្រុះសម្រួលបាននិយាយថា ការចរចារបស់អាមេរិកត្រូវបានដឹកនាំដោយប្រេសិតរបស់លោក Trump គឺលោក Steve Witkoff និងកូនប្រសាលោក គឺលោក Jared Kushner។ ប្រសិនបើភាគីទាំងពីរយល់ព្រមលើកិច្ចព្រមព្រៀងបឋម វានឹងចាប់ផ្តើមការចរចាលម្អិតរយៈពេល ៣០ ថ្ងៃ ដើម្បីឈានទៅដល់កិច្ចព្រមព្រៀងពេញលេញ។

ខណៈពេលដែលប្រភពនិយាយថា អនុស្សរណៈនេះនឹងមិនទាមទារការសម្បទានពីភាគីណាមួយនៅឡើយទេ ប៉ុន្តែពួកគេមិនបានលើកឡើងពីលក្ខខណ្ឌសំខាន់ៗមួយចំនួនដែលទីក្រុងវ៉ាស៊ីនតោនធ្លាប់បានទាមទារនាពេលកន្លងមក ហើយអ៊ីរ៉ង់បានបដិសេធ ដូចជាការរឹតត្បិតលើកម្មវិធីមីស៊ីលរបស់អ៊ីរ៉ង់ និងការបញ្ចប់ការគាំទ្រដល់ក្រុមប្រដាប់អាវុធក្នុងតំបន់មជ្ឈិមបូព៌ាជាដើម។ ប្រភពក៏មិនបានលើកឡើងអំពីស្តុកអ៊ុយរ៉ាញ៉ូមកម្រិតខ្ពស់ជាង ៤០០ គីឡូក្រាមដែលអ៊ីរ៉ង់កំពុងមានបច្ចុប្បន្ននោះដែរ។

ប្រភពពី សារព័ត៌មាន Reuters