សម្តេចធិបតី ជំរុញការថែរក្សាព្រលឹងជាតិ និងទាញសក្តានុពលទេសចរណ៍បេតិកភណ្ឌ ក្នុងខួប ៣ឆ្នាំ នៃការចុះកោះកេរក្នុងបញ្ជី UNESCO

ភ្នំពេញ, ថ្ងៃទី១៦ ខែកញ្ញា ឆ្នាំ២០២៦៖ នាថ្ងៃទី១៧ ខែកញ្ញា ឆ្នាំ២០២៦ នេះ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា បានផ្ញើសារលិខិតផ្លូវការសម្តែងនូវសេចក្តីសោមនស្សរីករាយយ៉ាងជ្រាលជ្រៅ និងចូលរួមអបអរសាទរជាមួយសម្តេចព្រះសង្ឃរាជ ព្រះថេរានុត្ថេរៈគ្រប់ព្រះអង្គ និងបងប្អូនជនរួមជាតិកម្ពុជាទាំងអស់ ក្នុងឱកាស «ខួប៣ឆ្នាំ នៃការចុះរមណីយដ្ឋានប្រាសាទកោះកេរ ក្នុងបញ្ជីបេតិកភណ្ឌពិភពលោក» ១៧ កញ្ញា ២០២៣ - ១៧ កញ្ញា ២០២៦។

សម្តេចធិបតី បានគូសបញ្ជាក់ថា ការទទួលស្គាល់អតីតរាជធានីកោះកេរ ដែលជាស្នាព្រះហស្តដ៏ស្ទាត់ជំនាញរបស់ព្រះបាទជ័យវរ្ម័នទី៤ ក្នុងសម័យអង្គរដ៏រុងរឿង គឺជាសាក្សីបង្ហាញពីកិត្យានុភាពវប្បធម៌ដ៏ខ្ពស់ត្រដែតរបស់ជាតិខ្មែរនៅលើឆាកអន្តរជាតិ។ សមិទ្ធផលប្រវត្តិសាស្ត្រនេះកើតចេញពីកិច្ចខិតខំប្រឹងប្រែងឥតឈប់ឈររបស់រាជរដ្ឋាភិបាលកម្ពុជា ក្រោមម្លប់នៃសន្តិភាព និង «នយោបាយឈ្នះ-ឈ្នះ» របស់សម្តេចអគ្គមហាសេនាបតីតេជោ ហ៊ុន សែន ដែលបានបង្រួបបង្រួមជាតិ និងបង្កើតមូលដ្ឋានគ្រឹះរឹងមាំសម្រាប់ការអភិរក្ស និងអភិវឌ្ឍសម្បត្តិបេតិកភណ្ឌជាតិ។

ប្រមុខរាជរដ្ឋាភិបាលបានសម្តែងនូវការកោតសរសើរចំពោះថ្នាក់ដឹកនាំ និងមន្ត្រីរាជការនៃក្រសួងវប្បធម៌និងវិចិត្រសិល្បៈ, អាជ្ញាធរជាតិព្រះវិហារ, អ្នកជំនាញជាតិ-អន្តរជាតិ ព្រមទាំងដៃគូអភិវឌ្ឍន៍ទាំងអស់ដែលបានលះបង់កម្លាំងកាយចិត្តក្នុងការអភិរក្ស និងជួសជុលប្រាសាទបុរាណសំខាន់ៗ ដូចជា ប្រាសាទបល្ល័ង្គជើង, ប្រាសាទប្រាំ, ប្រាសាទក្រហម, ប្រាសាទគោកគ្រង និងប្រាសាទក្រចាប់។ ការសិក្សាស្រាវជ្រាវពហុវិស័យ ដោយគ្របដណ្តប់លើផ្នែកបុរាណវិទ្យា, ជាតិពន្ធវិទ្យា, ស្ថាបត្យកម្ម និងអេកូឡូស៊ី ដើម្បីស្វែងយល់បន្ថែមអំពីប្រវត្តិសាស្ត្រ ព្រមទាំងការរៀបចំក្រុង និងប្រព័ន្ធធារាសាស្ត្របុរាណ។


បន្ថែមពីលើនោះ សម្តេចធិបតី បានណែនាំដល់អាជ្ញាធរខេត្តព្រះវិហារ និងអាជ្ញាធរជាតិព្រះវិហារ ត្រូវបន្តសហការយ៉ាងហ្មត់ចត់ក្នុងការគ្រប់គ្រង និងអភិរក្សប្រាង្គប្រាសាទ, បុរាណដ្ឋាន, ទំនៀមទម្លាប់, ដីធ្លី, ព្រៃឈើ និងសត្វព្រៃ ឱ្យស្របតាមបទដ្ឋាន និងគោលការណ៍ប្រតិបត្តិរបស់គណៈកម្មាធិការបេតិកភណ្ឌពិភពលោក។ ប្រមុខរដ្ឋាភិបាលបានរំលេចថា ប្រជាពលរដ្ឋគ្រប់រូបគឺជា «ម្ចាស់ស្មើៗគ្នា» លើសម្បត្តិបេតិកភណ្ឌ និងមានកាតព្វកិច្ចរួមគ្នាក្នុងការការពារលើកតម្លៃមរតកជាតិ។

សម្តេចមហាបវរធិបតី ហ៊ុន ម៉ាណែត ក៏បានអំពាវនាវដល់គ្រប់បណ្តាញព័ត៌មានទាំងអស់ ចូលរួមផ្សព្វផ្សាយព្រឹត្តិការណ៍នេះឱ្យបានទូលំទូលាយ និងអធិកអធម ដើម្បីអបអរសាទរខួប ៣ឆ្នាំនេះ ព្រមទាំងបន្តជំរុញសក្តានុពលទេសចរណ៍ ដោយផ្សារភ្ជាប់រមណីយដ្ឋានកោះកេរ ជាមួយតំបន់បេតិកភណ្ឌពិភពលោកឯទៀតរបស់កម្ពុជា ដូចជារមណីយដ្ឋានអង្គរ, ប្រាសាទព្រះវិហារ, ប្រាសាទសំបូរព្រៃគុក និងតំបន់ទេសចរណ៍វប្បធម៌-ធម្មជាតិផ្សេងៗទៀតផងដែរ៕


​រាយការណ៍ដោយ សារព័ត៌មាន The Khmer Daily Network