នាវាទេសចរណ៍អន្តរជាតិ VIKING ORION នាំភ្ញៀវទេសចរជិត ៩០០ នាក់ ចូលចតនៅកំពង់ផែស្វយ័តក្រុងព្រះសីហនុ ជំរុញកំណើនទេសចរណ៍ផ្លូវទឹក

ភ្នំពេញ, ថ្ងៃទី១០ ខែវិច្ឆិកា ឆ្នាំ២០២៦៖ វិស័យទេសចរណ៍ផ្លូវទឹករបស់ព្រះរាជាណាចក្រកម្ពុជា បន្តបង្ហាញសញ្ញាណវិជ្ជមានយ៉ាងខ្លាំង ដោយនាវាទេសចរណ៍អន្តរជាតិដ៏ធំមួយគ្រឿង ឈ្មោះ VIKING ORION សញ្ជាតិណ័រវែស (Norway) បានចូលចតនៅកំពង់ផែស្វយ័តក្រុងព្រះសីហនុ (កសស) ដោយសុវត្ថិភាព នាវេលាម៉ោង ៧:០៥ នាទីព្រឹក ថ្ងៃទី១០ ខែវិច្ឆិកា ឆ្នាំ២០២៦ នេះ ដើម្បីនាំភ្ញៀវទេសចរអន្តរជាតិមកទស្សនាកម្ពុជា។

យោងតាមរបាយការណ៍ផ្លូវការពីកំពង់ផែស្វយ័តក្រុងព្រះសីហនុ នាវាទេសចរណ៍អន្តរជាតិ VIKING ORION មានប្រវែងបណ្តោយ ២២៨.៣០ ម៉ែត្រ ប្រវែងទទឹង ២៨.៨០ ម៉ែត្រ ជម្រៅទឹក -៦.៨០ ម៉ែត្រ។ នាវាទេសចរណ៍ដ៏ប្រណីតនេះ បានធ្វើដំណើរចូលចតនៅកម្ពុជា បន្ទាប់ពីបានចាកចេញពីប្រទេសវៀតណាម។

Photo: Sihanoukville Autonomous Port
នាវាទេសចរណ៍នេះ មាននាវិកសរុបចំនួន ៤៦៥ នាក់ (ស្រី ១១១ នាក់) មាន ៣៤ សញ្ជាតិ​ និងមានភ្ញៀវទេសចរណ៍សរុបចំនួន ៨៨៨​ នាក់ (ស្រី ៤៧០ នាក់)​ មាន ១៤ សញ្ជាតិ។ ក្នុងនោះ សញ្ជាតិដែលមានចំនួនភ្ញៀវទេសចរណ៍ច្រើនជាងគេ គឺ សហរដ្ឋអាមេរិក ចំនួន ៧៣៦ នាក់ (ស្រី ៣៩៣ នាក់) ហើយនាវាទេសចរណ៍អន្តរជាតិនេះ នឹងចាកចេញទៅ ប្រទេសថៃ នាវេលាម៉ោង ២ រសៀល នៅថ្ងៃទី១១ ខែវិច្ឆិកា ឆ្នាំ២០២៦។

តាមការបញ្ជាក់ពីអាជ្ញាធរកំពង់ផែ ភ្ញៀវទេសចរទាំងអស់នឹងចំណាយពេលទស្សនាកម្ពុជារយៈពេល ១ ថ្ងៃ ដើម្បីទស្សនា និងស្វែងយល់ពីតំបន់រមណីយដ្ឋាន វប្បធម៌ និងតំបន់ឆ្នេរដ៏ស្រស់ស្អាតនៃខេត្តព្រះសីហនុ ព្រមទាំងតំបន់ក្បែរខាង៕

រាយការណ៍ដោយ សារព័ត៌មាន The Khmer Daily Network